Tornyaseth yn Kernow
Dhyworth Wikipedia, an godhoniador rydh
Tornyaseth yw jynn poesek yn erbys Kernow arnowydh. Yma milyow a havysi ow kodriga Kernow, hag yn arbennik hy morrebow, rag omlowenhe y'n toemma hin yn Breten Veur oll. Serghek war dornyaseth yw leun a drevow yn Kernow, r.e. Lannwedhenek, Logh, Tewynn Pleustri, Aberfal, hag erell.
Niver a dornysi a vynn prena chiow yn Kernow rag galloes dehweles pub blydhen dhe'n keth tyller. Yma dervynn rag chiow Kernow ow kressya prisyow chiow rag pubhuni.
Nebes Kernowyon a grys na dal kevrohow havysi oy dhe'n gemmynieth leel, hag i ow tesa war an treth, gasa atal ena, ha dehweles dhe Bow Sows. Herwydh an breusow ma, tornysi yw danjer dhe wonisogeth Kernow.
Erbynn henna (yn-medh difennoryon tornyaseth yn Kernow), yma tornysi ow ri bywder erbysek y'n Dugeth wosa degeans dewysyansow sten ha kober; gwell yw dhe Gernow kemmeres prow dhiworta, ages gortos avel kyns lownyow balyow yn Glynnow Kembra po Konteth Evrek, rag ensompel. Ha gonisogeth Kernow hy honan yw dhe les a niver veur a dornysi.
